مرّي قمر في وجنتك نوره .. !

مرِّي قمر في وجْنتك نوره
.......... ضاوي على وجْه السما و الليل

رِدِّي عليّ من ماضي الصوره
.......... لون الوَهَج قبْل الشّقا والويل

داوي بقايا جْروح محْفوره
.......... تبْكي على بسْمه خذاها السيل

إنتي دوَى حالي وْ دكتوره
.......... إِقْرَيْ علَيّ ما فادني تحْليل

ناح الغرام وْ غرَّد شْعوره
.......... والقلب الاخضر مابقى به حيل

عاف السّهَر في بُعْدك حْضوره
.......... يا نكْهة القهْوه وريح الهيل

بان النهار وطارت طيوره
.......... واحلامي العذرا هتكْها سهيل

مات الوعد يسترحم سطوره
.......... ودموع عين ٍ خطّها التمْثيل !

ذِبْلَت على وجْناتك زْهوره
.......... حبّ ٍ نشف غرْسه بلا تحصيل

نمتي على الجنبين مسروره
.......... وانا على جرْف ٍ جذَبْه الميل

تسْهر جروح القلب مهجوره
.......... بانْفاسها بعض الحكي ما قيل

حتّى القصيد بْحالي بْحوره
.......... بعْدك غرق في موجة التعديل

ضاع الشِّعِر في زحْمة كْسوره
.......... شمْس الحقيقه خانها التطبيل

وانتي يَ ريحة قاع ممطوره
.......... هِبّي مثل نسمة شمال النيل

ونْ حَدِّتِك نفْسك على الثوره
.......... واحْتاجت المهْره أصيل الخيل

هِزِّي ضميرك لاخر جْذوره
.......... وافْرِش لك ضْلوع الغلا منديل

قصيدة جديدة راقت لي